Jón Axel Egilsson (1944), kvikmyndagerðarmaður frá Danska kvikmyndaskólanum 1979, er fæddur og  uppalinn í Vesturbænum. Hann var alltaf að teikna og var því sendur í barnadeild MHÍ og gekk vestan úr bæ upp á Grundarstíg. Hann var í Verzló en sótti kvöldnámskeið hjá Kurt Zier skólastjóra MHÍ og Benedikt Gunnarssyni.

​

Jón Axel skapaði kókómjólkurköttinn Klóa og teiknaði níu sjónvarpsauglýsingar með honum. Hann gerði fjórtán stuttar heimildamyndir um listamenn, LITHVÖRF, og heimildamynd um Birgi Andrésson: Næsti hálftími verður þrjú korter.

​

Jón Axel var fjármálastjóri MHÍ (1989-1991) þegar hann kynntist Gunnlaugi St. Gíslasyni sem spurði hvort Jón málaði bara auglýsingar. Jón sagðist ætla að vatnslita í ellinni. Gunnlaugur sagði að þá mætti hann byrja strax því það tæki 20 ár að verða góður vatnslitamálari. Jón Axel hóf nám hjá Gunnlaugi 1998 og stóð það samfellt til 2006 en þá söðlaði Jón um og hóf nám í þjóðfræði og listasögu við Háskóla Íslands.